काठमाडौं । जापानमा जारी २०औं एसियाली खेलकुदमा नेपालले पहिलो पदक जितेको छ । करातेका तेन्जिङ शेर्पाले पुरुष कुमिते ८४ केजी भन्दा माथिको तौल समूहमा कास्य पदक जितेका हुन् ।
टोयाहाशी जिम्नेसियममा बुधबार भएको सेमिफाइनलमा तेन्जिङ इरानका महमुद नेमातीसँग ५–० ले पराजित भएका थिए । सेमिफाइनलमा पराजित भएपछि उनले कास्य पदकका लागि प्रतिस्पर्धा गरेका थिए ।
कास्य पदकका लागि भएको खेलमा तेन्जिङले लाओसका वाथाना जायासनलाई ९–१ ले पराजित गरे । उनले युकोबाट ६ र इप्पोनबाट ३ अंक जोड्दै सहज जित निकाले ।
यसअघि क्वाटरफाइनलमा तेन्जिङ मकाउका खेलाडीसँग १–० ले पछाडि परेका थिए । तर विपक्षी खेलाडीले गरेको गल्तीका कारण तेन्जिङलाई विजेता घोषणा गरिएको थियो ।
तेन्जिङको कास्यसँगै २०औं एसियाली खेलकुदमा नेपालको पदक खाता खुलेको छ ।
