काठमाडौ। साउदी अरबबाट डिपोर्ट भएर नेपाल आइपुगेका तीन जना महिलाले १० वर्षअघि नक्कली नेपाली राहदानी प्रयोग गरी भारत हुँदै साउदी पुगेको तथ्य खुलेको छ। उनीहरू नेपाली भाषा र मातृभाषा बोल्न नसक्ने तथा नेपालमा आफ्नो स्थायी ठेगाना खुलाउन नसकेपछि त्रिभुवन विमानस्थल अध्यागमनले शंका गर्दै नियन्त्रणमा लिएको थियो। डिपोर्ट गरेका तीन जना कलमाया तामाङ, इन्द्रमाया लिम्बू र सानुमाया तामाङका नाममा नेपाली राजदूतावासमार्फत ट्राभल डकुमेन्ट बनाएर नेपाल आएका थिए ।
प्रारम्भिक अनुसन्धानमा उनीहरू नेपाली नागरिक नभई दुई जना भारतीय र एक जना बंगलादेशी महिला भएको आशंका गरिएको छ। संगठित गिरोहमार्फत नेपाली नाम र ठेगाना प्रयोग गरी हस्तलिखित नेपाली राहदानीमा फोटो परिवर्तन गरेर साउदी पठाइएको देखिएको छ।
