सिरहा। धनुषा सीमा क्षेत्रमा पर्ने कमला नदी माथि निर्माणाधीन पुल लामो समय सम्म अलपत्र पर्दा स्थानीयवासीले निरन्तर सास्ती खेपिरहेका छन्। हुलाकी राजमार्ग अन्तर्गत पर्ने उक्त पुल निर्माणका लागि २०६८ सालमै ठेक्का सम्झौता भएको भए पनि झण्डै डेढ दशक बितिसक्दा समेत काम सम्पन्न हुन सकेको छैन।
करिब ४६९ मिटर लामो उक्त पुल साढे तीन वर्षभित्र निर्माण सम्पन्न गर्ने लक्ष्य राखिएको थियो। तर, निर्माण कम्पनीले तोकिएको समयमा काम पूरा गर्न नसकेपछि पटक-पटक म्याद थपिएको थियो। त्यसपछि ठेक्का व्यवस्थापनमा परिवर्तन गरिए पनि अपेक्षित प्रगति हुन सकेन।
निर्माण अन्तिम चरणमा पुगेको बताइए पनि सामान्य बाढीले पुलका केही संरचनामा क्षति पुर्याएपछि काम पुनः प्रभावित भएको थियो। त्यसयता चार वर्षभन्दा बढी समय बितिसक्दा पनि पुनर्निर्माणले गति लिन सकेको छैन। पछिल्लो समय पुनः काम सुरु भएको भनिए पनि यसको स्पष्ट टुंगो लाग्न सकेको छैन।
पुल निर्माणमा ढिलाइ हुनुका साथै डिजाइनमै कमजोरी र निर्माण प्रक्रियामा अनियमितता भएको आरोपसमेत उठ्दै आएको छ। ठेकेदारले अधिकांश भुक्तानी लिइसकेको भए पनि काम अधुरै रहनुले सम्बन्धित निकायमाथि प्रश्न उठेको छ। यस विषयमा अनुसन्धान भइरहेको बताइन्छ।
पुल नबन्दा स्थानीयवासीले दैनिक आवतजावतमा ठूलो समस्या भोगिरहेका छन्। बर्खायाममा डुंगाको सहारामा नदी पार गर्नुपर्ने अवस्था छ भने सुख्खायाममा अस्थायी डाइभर्सन प्रयोग गर्नुपर्छ, जुन बाढीको समयमा जोखिमपूर्ण हुन्छ। छोटो दूरी पार गर्न पनि घुमाउरो बाटो प्रयोग गर्नुपर्दा समय र खर्च दुबै बढेको स्थानीयको गुनासो छ।
प्रत्येक चुनावमा यो पुल निर्माणको मुद्दा उठ्ने गरेको छ। नेताहरूले छिट्टै निर्माण सम्पन्न गर्ने प्रतिबद्धता जनाए पनि व्यवहारमा परिवर्तन नदेखिएको भन्दै स्थानीयमा निराशा बढ्दै गएको छ।
